Ibyo wamenya ku miterere y’inoti n’ibiceri bikoreshwa mu Rwanda

Ibyo wamenya ku miterere y’inoti n’ibiceri bikoreshwa mu Rwanda

Banki Nkuru y’u Rwanda iherutse kwamagana amashusho yakwirakwijwe ku mbuga nkoranyambaga y’inote ya 10.000 Frw, iboneraho no kwerekana ibirango by’ingenzi biranga inote n’ibiceri by’amafaranga yemewe akoreshwa mu Rwanda.

Iyo note ya 10.000 Frw yasakajwe kuva ku munsi w’ejo iriho ifoto ya Perezida Paul Kagame, ikirangantengo cy’u Rwanda n’ikibumbano cy’abasirikare b’Inkotanyi kiri ku Nteko.
BNR yamaganye iyi note mu itangazo yacishiije ku rukuta rwayo rwa Twitter, aho yagize iti “Turamenyesha abantu bose ko ishusho y’inoti y’ibihumbi icumi y’amafaranga y’u Rwanda yakwirakwiye kuri zimwe mu mbuga nkoranyambaga ari impimbano, nta note nk’iyo ihari bityo amakuru nkayo ntakwiye guhabwa agaciro.”
Iryo tangazo ryakomeje rivuga ko Leta y’u Rwanda ariyo yonyine ifite uburenganzira bwo gushyiraho no kwemeza inote cyangwa igiceri kandi bigatangazwa binyuze muri Banki Nkuru y’u Rwanda.
BNR yibukije ko uwigana, uhimba cyangwa ukwirakwiza amafaranga y’impimbano abihanirwa n’amategeko.
Iyi banki yatangaje ko inote n’ibiceri byemewe mu Rwanda, ari igiceri cya 1 Frw, 5 Frw, 10 Frw, 20 Frw, 50 Frw n’icya 100 Frw, mu gihe inote zemewe ari iya 500 Frw, 1000 Frw, 2000 Frw n’iya 5000 Frw.
-  Ibimenyetso by’ingenzi biranga inote n’ibiceri byemewe mu Rwanda
Inote ya 5000 Frw
Hariho ubwoko bubiri bw’inote za 5000 Frw zikoreshwa mu Rwanda, zose zihuriye ku ibara ry’iroza, ku ruhande rumwe ziriho ishusho y’ingagi iri muri Pariki y’Ibirunga, uruziga rw’umweru rubengeranamo utuzu dutatu tugiye dufatanye, rurimo ikirangantego cya Repubulika y’u Rwanda ndetse n’ikirango cya BNR. Ku rundi ruhande hariho igiseke kinini n’akandi gato ndetse n’umurongo utambitse uranga umutekano wayo wanditseho ‘BNR’.
Icyo izo note zitandukaniyeho ni ikindi kimenyetso cyerekana umutekano wayo kiyirinda kuba yakwiganwa. Iyakozwe mu 2004 iriho umurongo uhagaze ugizwe n’ikirangantego cy’u Rwanda, icya BNR ndetse n’umubare w’amafaranga 5000, mu gihe indi yakozwe mu 2014 iriho ingagi.
-  Inote ya 2000 Frw
Inote za 2000 nazo ziri mu bwoko bubiri. Zose zifite ibara rya move yerurutse, ku ruhande rumwe rwazo hariho umunara w’itumanaho ndetse n’uwa televiziyo byose biri ku musozi. Uruziga rw’umweru rubengeranamo uturongo dutatu tugiye dufatanye, rurimo ikirangantego cya Repubulika y’u Rwanda ndetse n’ikirango cya BNR, naho ku rundi ruhande rw’inote hariho imbuto z’ikawa zitonoye, n’umurongo utambitse uranga umutekano wayo wanditseho ‘BNR’.
Ikizitandukanya ni ikindi kimenyetso cy’umutekano. Imwe ifite umurongo uhagaze uriho ikirangantego cy’u Rwanda, icya BNR ndetse n’umubare w’amafaranga 2000, yasohotse mu 2007. Indi yo indi ifite ikirango cy’agaseke ikaba yarasohotse mu 2014.
Inote ya 1000 Frw
Inote za 1000 Frw zirimo ubwoko butatu butandukaniye ku bimenyetso by’umutekano, aho iyasohotse mu 2008 iriho ikimenyetso cy’umurongo uhagaze uriho ikirangantego cy’u Rwanda, ikirango cya BNR, ndetse n’umubare w’amafaranga.
Iyasohotse mu 2015 yo ifite ikimenyetso cy’inuma iri mu ibara ry’icyatsi, naho iyasohotse mu 2019 iriho intore ihamiriza iri mu ibara rya zahabu.
Izi note zose zihuriye ku ibara ry’ubururu, Ingoro Ndangamurage y’u Rwanda, Uruziga rw’umweru rubengeranamo uturongo dutatu tugiye dufatanye, rurimo ikirangantego cya Repubulika y’u Rwanda n’ikirango cya BNR, naho ku rundi ruhande hariho inkende iri muri Pariki y’Ibirunga n’umurongo utambitse wanditseho ’BNR 1000’.
Inote ya 500 Frw
Inote za 500 Frw nazo ziri mu bwoko butatu, zihuriye ku kuba zifite uruziga rw’umweru rubengeranamo uturongo dutatu tugiye dufatanye, rurimo ikirangantego cya Repubulika y’u Rwanda n’ikirango cya BNR, ahandi hose ziratandakunye yaba mu ibara no mu birango biziranga.
Iyasohotse ku itariki mu 2008 iri mu ibara ry’icyatsi, ku ruhande rumwe iriho inyubako ya Banki Nkuru y’u Rwanda na rwa ruziga, mu gihe ku rundi ruhande hariho abantu batatu bafite ibitebo bari gusarura icyayi mu murima n’ikimenyetso kiranga umutekano wayo cy’umurongo uhagaze uri mu ibara rya zahabu wanditsemo ’BNR 500’.
Inote ya 500 yasohotse mu 2013 yo iri mu ibara ry’ivu n’ubururu, iriho inka eshatu ziri mu murima, naho ku rundi ruhande hariho abana bane bafite mudasobwa ndetse n’umurongo uhagaze wanditsemo ’BNR 500’.
Iheruka ni iyasohotse ku itariki mu 2019, iriho rwa ruziga, n’ikiraro kiri hejuru mu Ishyamba rya Nyungwe mu gihe ku rundi ruhande hariho abana batatu bafite mudasobwa, inafite umurongo uhagaze wanditsemo ’BNR 500’.
-  Ibiranga ibiceri byemewe bikoreshwa mu Rwanda
Ibiceri byose ku ruhande rumwe bifite ikirangantengo cya Repubulika y’u Rwanda n’umubare w’amafaranga y’icyo giceri mu gihe ku rundi handitseho Banki Nkuru y’u Rwanda n’ikirango kiranga buri giceri, uretse gusa icy’ijana cyanditseho 100 Frw kikazengurukwa na ‘Banki Nkuru y’u Rwanda.’
Icya 1 Frw gifite ikirango cy’umuceri, icya 5 Frw gifite ikirango cy’ikawa, icya 10 Frw kigira ikirango cy’insina iriho igitoki, icya 20 Frw kiriho ikirango cy’icyayi, mu gihe icya 50 Frw kiriho ikigori.
Amwe muri aya mafaranga yashushanyijwe na Kilibomenecyo Alphonse, umunyabugeni wanahanze ibendera ry’igihugu n’ikirangantego cya Repubulika y’u Rwanda.
Kilimobenecyo yashushanyije inote ya 5000 Frw, 2000 Frw, 1000 Frw, 500 Frw ndetse n’igiceri cy’ijana yakoze mu minota 10 gusa.

Amakuru Ikoranabuhanga Imideli Imyidagaduro Inkuru Nyamukuru Mu Mahanga Mu Rwanda Muzika Ubuzima & Siporo Umuco